Vetëm pak ditë pas hapjes për qarkullim të segmentit të parë të zgjeruar prej 6 kilometrash në autostradën Tiranë–Durrës, Autoriteti Rrugor Shqiptar ka vënë në lëvizje një tjetër investim të konsiderueshëm. Këtë herë fokusi nuk është te infrastruktura rrugore në vetvete, por te përmirësimi i pamjes dhe krijimi i një korridori të gjelbër përgjatë këtij aksi strategjik.
Bëhet fjalë për një procedurë tenderimi me një fond limit prej rreth 13.7 milionë eurosh, që synon ndërhyrje në segmentin nga zona e Doganës deri në nënkalimin e Limuthit. Qëllimi kryesor i projektit është riformësimi vizual i një prej hyrjeve kryesore të vendit, përmes shtimit të elementëve natyrorë dhe rregullimit urban të hapësirave përgjatë autostradës.
Ky investim është paralajmëruar më herët edhe gjatë një inspektimi në terren, ku ishte i pranishëm edhe kryeministri Edi Rama, duke sinjalizuar rëndësinë që i jepet këtij segmenti jo vetëm si arterie transporti, por edhe si kartë prezantuese e vendit.
Sipas të dhënave zyrtare, ndërhyrjet do të përfshijnë shtresëzim me dhe vegjetal, mbjellje bari, instalim të shkurreve dekorative dhe pemëve, si dhe vendosjen e një sistemi modern ujitjeje për mirëmbajtjen e vazhdueshme të gjelbërimit.
Në total, sipërfaqja që do të trajtohet arrin në rreth 65 mijë metra katrorë. Trafikndarësja qendrore do të shtrihet përgjatë mbi 7 kilometrave dhe do të mbushet me bimësi dekorative, ndërsa përgjatë anëve të autostradës do të krijohen breza të gjelbër me pemë dhe shkurre në gjerësi të ndryshme.
Një komponent i rëndësishëm i projektit është edhe krijimi i rreth 31 mijë metrave katrorë sipërfaqe me bar, të cilat do të mirëmbahen përmes një sistemi të automatizuar ujitjeje me kontroll në distancë, duke garantuar funksionalitet dhe qëndrueshmëri në kohë.
