Unioni i Gazetarëve Shqiptarë ka reaguar ashpër ndaj dhunimit të gazetarit Elton Tozaj, një ngjarje e rëndë që ka shkaktuar shqetësim të thellë në komunitetin mediatik. Rasti është raportuar nga disa media dhe është konfirmuar edhe nga familjarët e gazetarit.
Sipas informacionit zyrtar të bërë publik nga UGSH, episodi i dhunës ka ndodhur në autostradën Tiranë–Durrës dhe është konstatuar nga dhjetëra qytetarë që ndodheshin në zonë në momentin e ngjarjes.
Akti i ushtruar ndaj gazetarit konsiderohet i rëndë, kriminal dhe plotësisht i papranueshëm, duke ngritur shqetësime serioze për sigurinë e gazetarëve dhe lirinë e medias.
Familjarët e Elton Tozajt kanë bërë të ditur se gjendja e tij shëndetësore paraqitet e rënduar, ndërsa ai po përballet me komplikacione serioze dhe po lufton për të ruajtur shikimin.
Në reagimin e saj, UGSH u bën thirrje institucioneve përgjegjëse që të zbardhin në mënyrë të plotë rrethanat e kësaj ngjarjeje dhe të çojnë para drejtësisë autorët e dhunës. Njëkohësisht, Unioni shpreh solidaritetin me gazetarin e dhunuar dhe i uron atij shërim sa më të shpejtë dhe të plotë.
Reagimi i plotë:
Deklaratë e Unionit të Gazetarëve Shqiptarë
Dhuna ndaj gazetarit Elton Tozaj, akt kriminal që duhet zbardhur dhe autorët të ndëshkohen
Tiranë më 27.12.2025
UGSH ndan me shqetësim dhe tronditje lajmin e publikuar nga shumë media dhe familjarë të gazetarit Elton Tozaj, për dhunimin barbar që persona të identifikuar kanë kryer mbi kolegun.
Ngjarja e ndodhur në autostradën Tiranë-Durrës, e vërejtur nga dhjetra kalimtarë, përbën një akt kriminal dhe dhunues.
Gazetari Tozaj për këtë arsye, sipas familjarëve, ndodhet në gjendje të rënduar shëndetësore dhe në luftë për ruajtjen e shikimit.
UGSH kërkon sqarimin zyrtar të këtij episodi dhe ndëshkimin e dhunuesve, sikundër i urojmë kolegut shërim të shpejtë dhe të plotë!
Zyra Informuese
Unioni i Gazetarëve Shqiptarë
