Këshilli i Ministrave ka zhvilluar sot mbledhjen e radhës, ku janë miratuar disa vendime me rëndësi për administratën publike dhe zhvillimin ekonomik të vendit.
Ndër vendimet kryesore, qeveria miratoi propozimin drejtuar Kuvendit për emërimin në postin e Drejtorit të Përgjithshëm të Institutit të Statistikave (INSTAT). Kandidaturat që do t’i paraqiten Kuvendit janë:
- Elsa Dhuli
- Ledjon Shahini
- Lantona Sado
Gjithashtu, me propozimin e ministrit të Financave, u miratua procedura e raportimit të të dhënave nga Autoritetet Licensuese dhe Mbikëqyrëse, në kuadër të ligjit për parandalimin e pastrimit të parave, financimit të terrorizmit dhe përhapjes së armëve të shkatërrimit në masë.
Sipas vendimit, autoritetet mbikëqyrëse që kanë detyrimin për raportim janë:
-
Banka e Shqipërisë
-
Autoriteti i Mbikëqyrjes Financiare
-
Organet e qeverisjes qendrore
-
Agjencia e Mbikëqyrjes së Lojërave të Fatit
-
Ministria e Drejtësisë
-
Dhoma Kombëtare e Avokatisë
-
Ministria përgjegjëse për infrastrukturën
-
Agjencia e Inteligjencës Financiare
-
Bordi i Mbikëqyrjes Publike
Në këtë listë përfshihen gjithashtu një sërë sektorësh privatë si agjencitë e udhëtimit, ndërtimi, tregtia e metaleve dhe gurëve të çmuar, audituesit dhe kontabilistët e miratuar.
Në të njëjtën mbledhje, Xhemal Qefalia u emërua zëvendësministër i Punëve të Brendshme, duke zëvendësuar një nga figurat e deritanishme të këtij institucioni.
Një tjetër vendim i rëndësishëm ishte shpallja e disa zonave të Bashkisë Kukës si “zona me përparësi zhvillimin e ekonomisë malore”, ku do të nxisen aktivitetet:
-
ekonomike,
-
industriale,
-
turistike.
Ndërkohë, me propozimin e ministrit të Bujqësisë, Këshilli i Ministrave miratoi edhe projektligjin “Për nënproduktet me origjinë shtazore”, i cili synon minimizimin e risqeve për shëndetin publik dhe atë të kafshëve, si dhe garantimin e sigurisë së zinxhirit ushqimor.
