Nafta në Shqipëri, edhe pa taksa mbetet më e shtrenjta në rajon!

Deputeti i PS, Erion Braçe, ka reaguar në rrjetet sociale lidhur me nivelin e çmimit të naftës në Shqipëri, duke theksuar se ai mbetet ndër më të lartët në rajon, edhe nëse përjashtohen taksat.

Sipas Braçes, çmimi neto i naftës në vend arrin në rreth 0.984 euro për litër, duke rezultuar më i lartë krahasuar me vende si Mali i Zi, Greqia, Kosova, Serbia dhe Maqedonia e Veriut.

Ai argumenton se edhe nëse hiqen komponentë si akciza, TVSH-ja apo taksa e qarkullimit, çmimi në Shqipëri mbetet deri në 40% më i lartë se në vendet e rajonit. Për këtë, deputeti i referohet një analize të publikuar nga ALTAX dhe platforma Polifakt.

Sipas tij, shkaku kryesor lidhet me mënyrën se si funksionon tregu i karburanteve në vend, të cilin e cilëson si “abuziv, klientelist dhe të mbrojtur”.

Braçe sjell në vëmendje edhe një shembull nga Italia, ku ulja e akcizës nga qeveria nuk u reflektua plotësisht në çmimet për konsumatorët, pasi një pjesë e operatorëve nuk e zbatuan këtë masë, ndërsa në disa raste çmimet madje u rritën.

Ai paralajmëron se edhe në Shqipëri ekziston rreziku që çdo ulje e taksave të mos reflektohet në çmimin final për qytetarët, për shkak të strukturës së tregut.

Në përfundim, Erion Braçe thekson se tregu i karburanteve ndikohet më shumë nga politika sesa nga faktorë të pastër ekonomikë, duke cituar ekspertin e njohur të energjisë Daniel Yergin, sipas të cilit “nafta është 10% ekonomi dhe 90% politikë”.

Postimi i plotë: