Një konflikt i dhunshëm mes dy grupeve të rinjsh shqiptarë ka tronditur qendrën e Athinës, duke lënë disa persona të plagosur rëndë dhe duke vënë në alarm autoritetet greke. Ngjarja ka ndodhur në zonën e Kato Patisias, ku raportohet se rreth 26 persona janë përfshirë në përleshje, ndërsa disa prej tyre kanë përfunduar në pranga.
Sipas mediave greke, tre persona kanë mbetur të plagosur rëndë gjatë konfliktit, pasi janë goditur me thika në zonën e gjoksit, pranë zemrës. Të plagosurit janë transportuar me urgjencë në spital dhe ndodhen nën kujdesin e mjekëve.
Përplasja mes grupeve ka qenë tepër e dhunshme. Të rinjtë janë sulmuar me thika, shkopinj dhe sende metalike, ndërsa gjithçka ka ndodhur në sy të kalimtarëve të shumtë në një nga zonat e populluara të kryeqytetit grek. Pamjet e publikuara nga mediat vendase tregojnë momentet e sulmit, ku disa persona vërsulen ndaj dy të tjerëve me mjete prerëse.
Sipas raportimeve, përplasja e parë mes grupeve ka ndodhur më 21 dhjetor 2025, ndërsa disa ditë më vonë është shënuar një tjetër incident në të njëjtën zonë, duke përshkallëzuar konfliktin.
Dëshmitë e para të personave të ndaluar në polici sugjerojnë se shkaku fillestar i sherrit mund të ketë qenë një vajzë. Megjithatë, hetuesit grekë po shqyrtojnë si pistë kryesore përplasjen për kontrollin e trafikut të drogës në zonë, çka e bën ngjarjen edhe më të rëndë.
Gjatë kontrolleve në banesat e të dyshuarve, policia greke ka sekuestruar sasi të konsiderueshme lëndësh narkotike dhe armësh të ftohta. Konkretisht janë gjetur 97 gramë kanabis, 52 gramë kokainë, 51 gramë metamfetaminë, gjashtë thika dhe një peshore elektronike precize që dyshohet se përdorej për ndarjen e drogës.
Autoritetet greke vijojnë hetimet për të zbardhur plotësisht rrethanat e ngjarjes, si dhe për të verifikuar nëse të përfshirët janë pjesë e grupeve të organizuara kriminale që veprojnë në Athinë dhe më gjerë.
