Më 29 janar 2026, komisioni i Ministrisë së Brendshme intervistoi 8 kandidatët për postin e Drejtorit të Gardës së Republikës. Sipas procedurës, para intervistimit ishte kryer verifikimi i figurës dhe i aftësive profesionale të secilit kandidat.

Më 4 shkurt 2026, ministrja e Brendshme Albana Koçiu u dërgoi kandidatëve njoftim elektronik, ku thuhej se pas përfundimit të fazave të verifikimit dhe vlerësimit, procedura “nuk është finalizuar me fitues”.

Sipas parashikimeve ligjore, në rast se nuk shpallet fitues, gara duhet të përsëritet me kandidatë të tjerë. Megjithatë, sipas të dhënave të paraqitura, nga 8 kandidatura vetëm një prej tyre, Simon Zereci, nuk përmbushte kriteret ligjore, përfshirë ato të integritetit sipas ligjit të dekriminalizimit, moshës, aftësive drejtuese, arsimimit dhe certifikatës së besueshmërisë.

Pretendohet se pavarësisht kësaj, Zereci ishte paracaktuar për t’u emëruar në krye të Gardës. Si rrjedhojë, gara u anulua dhe nuk u rihap publikisht. Në vijim, 63-vjeçari Simon Zereci u emërua Drejtor i Gardës, ndonëse, sipas pretendimeve, nuk plotësonte kushtet ligjore as për drejtimin e institucionit dhe as për funksione më të ulëta brenda strukturës.

Lidhje familjare dhe konflikt interesi

Sipas të dhënave të publikuara, Simon Zereci ka lidhje krushqie me familjen e kryeministrit Edi Rama. Konkretisht, motra e tij rezulton e martuar me djalin e Spiro Koleka. Kjo lidhje përmendet si element që ngre dyshime për klientelizëm në procesin e emërimit.

Çështja e certifikatës së sigurisë dhe Vettingut

Sipas informacionit të paraqitur, Simon Zerecit i është refuzuar Certifikata e Sigurisë në momentin e emërimit si zv/drejtor, si dhe në qershor 2025, kur u komandua Drejtor i Gardës. Refuzimi lidhej me pretendime për mungesë integriteti dhe probleme besueshmërie.

Po ashtu, theksohet se ai është emëruar pa kaluar procesin e Vettingut, ndërsa mosha 63 vjeç, sipas ligjit për pensionin, do t’i lejonte qëndrimin në detyrë për rreth 2 vite, ndonëse mandati i Drejtorit të Gardës është 5-vjeçar.

Pretendime për precedentë penalë dhe shkelje

Në referencë të Ligjit nr. 33, datë 14 mars 2021, kërkohet që figura dhe aktiviteti i Drejtorit të Gardës të verifikohet në mënyrë të plotë përpara emërimit.

Sipas pretendimeve të ngritura:

Simon Zereci rezulton me dosje penale për dhunë, grabitje sendesh personale dhe pengmarrje të shtetasit Iris Peti, ngjarje e datës 22 prill 2022, kur shërbente si Komandant Grupi në Njësinë Speciale.
Në dosjen e tij në Gardë janë regjistruar 8 raste dhune fizike, ndërsa në AMP rezulton një dosje me abuzime të tjera gjatë dhe jashtë detyrës.
Raporte të SHISH dhe strukturave të tjera të sigurisë pretendojnë se ai ka transportuar persona në kërkim me automjete të Gardës dhe ka pajisur mjete të personave me precedentë me logo të institucionit.
Në maj 2023, nga inventari i Njësisë Speciale të Gardës u raportua zhdukja e 4 pistoletave; sipas pretendimeve, hetimet orientuan dyshimet drejt tij, por pa pasoja penale.
Emri i tij është përmendur edhe në lidhje me vetëvrasjen brenda territorit të Gardës të shoferit të ish-ministrit të Brendshëm.
Është përmendur në dosje që lidhen me 6 gardistë dhe ish-gardistë të arrestuar apo dënuar për trafik armësh, droge dhe kontrabandë.
Sipas të dhënave, është përjashtuar nga strukturat e Gardës për lidhje me aktivitete kriminale dhe është rikthyer në vitin 2013 me dokumentacion të kontestuar.
Pretendohet se ka fshehur një plagosje me armë zjarri gjatë kohës kur shërbente si zv/komandant.
Gjatë periudhës si drejtor i komanduar, thuhet se ka punësuar persona me precedentë penalë dhe dokumente arsimore të falsifikuara, me dosje të përgatitura nga bashkëshortja e tij, Albana Bogdan, punonjëse në sektorin e Burimeve Njerëzore në Gardë.