Vatër infeksioni me minj që lëviznin nëpër plehra

Deputeti socialist Erion Braçe ka ngritur shqetësimin për një situatë ndotjeje në një nga zonat më të frekuentuara të kryeqytetit, duke ndarë edhe një video në rrjetet sociale.

Në pamjet e publikuara nga rruga “Myslym Shyri” në Tirana, dallohen mbetje të shumta urbane të hedhura në hapësirë publike, përfshirë dyshekë, veshje dhe materiale të tjera të braktisura. Sipas tij, kjo gjendje përbën një problem serioz dhe është e papranueshme për standardet e një zone kaq të rëndësishme të qytetit.

Braçe thekson se veprime të tilla reflektojnë mungesë të theksuar përgjegjshmërie nga ana e personave që i kanë lënë mbeturinat në rrugë, duke krijuar jo vetëm ndotje vizuale, por edhe rrezik për shëndetin publik.

Ai paralajmëron se grumbullimi i mbetjeve në këtë formë mund të shndërrohet në një vatër infeksioni, duke favorizuar përhapjen e dëmtuesve dhe sëmundjeve. Në këtë kuadër, deputeti kërkon ndërhyrje të menjëhershme për pastrimin e zonës, si dhe masa të plota dezinfektimi dhe dezinfektimi kundër insekteve.

Postimi i plotë:

“NË TERRITOR, SI DEPUTET I TIRANËS NË MES TË MYSLYM SHYRIT, KY NIVEL PISLLËKU!

Nuk di në e ka prishur IMT dhe e ka lënë kështu apo e ka prishur i zoti dhe e ka lënë kështu; Por cilido që e ka prishur i ka borxh lagjes pastrimin e menjëhershëm; unë nuk e di si mund të jesh kaq i papërgjegjshëm!

Kjo është një vatër infeksioni me minj që lëviznin nëpër plehra; JO VETËM DUHET PASTRUAR MENJËHERË-është në ballinë të rrugës më të frekuentuar në këtë qytet, POR EDHE DUHET DEZINFEKTUAR, DEZISNSEKTUAR!”, shkruan Braçe.