Policia greke është vënë në ndjekje të tre personave të dyshuar për një grabitje me armë të ndodhur në një bankë në Kato Tithorea, një ngjarje që ka tronditur zonën dhe ka ngritur alarmin për sigurinë në institucionet financiare.
Sipas informacioneve paraprake, ngjarja ka ndodhur ditën e sotme, kur dy persona të armatosur hynë në ambientet e bankës, ndërsa një i tretë qëndroi jashtë në automjet, në pritje për largimin e shpejtë. Njëri prej grabitësve ishte i pajisur me armë automatike të tipit kallashnikov, ndërsa tjetri mbante një pistoletë.
Nën kërcënimin e armëve, autorët detyruan punonjësit të hapnin kasafortën. Megjithatë, sistemi i sigurisë me vonesë automatike i detyroi ata të qëndronin për rreth 30 minuta brenda bankës, duke rritur tensionin gjatë gjithë kohës së grabitjes.
Pavarësisht kësaj pengese, raportimet paraprake tregojnë se autorët kanë mundur të marrin një shumë që dyshohet të arrijë deri në 200 mijë euro.
Pas realizimit të grabitjes, ata janë larguar me automjetin që i priste jashtë, duke u drejtuar drejt zonës malore të Parnassos, ku dyshohet se kanë humbur gjurmët.
Në momentin e ngjarjes, brenda bankës ndodheshin tre persona, fatmirësisht pa raportime për të lënduar.
Policia ka ngritur postblloqe dhe po vijon kontrollet intensive në zonë, ndërsa hetimet janë në zhvillim për identifikimin dhe kapjen e autorëve.
