Reshjet e dëborës të ditëve të fundit kanë izoluar dhjetëra fshatra në qarkun e Kukësit, kryesisht në njësitë administrative Shishtavec, Zapod, Topojan dhe Tërthore. Banorët po përballen me mungesë energjie elektrike, bllokim të rrugëve dhe ndërprerje të valëve telefonike, duke i lënë ata të pamundur për të komunikuar apo për të marrë ndihmë në raste emergjente.

Tërthore: 24 orë pa energji elektrike

Në njësinë administrative Tërthore, e cila ndodhet pak kilometra larg Kukësit dhe Rrugës së Kombit, banorët janë prej më shumë se 24 orësh pa energji elektrike. Megjithëse reshjet e borës kanë pushuar, furnizimi me energji nuk është rikthyer. “Është dimër, në prag të Vitit të Ri, dhe nuk ka as borë e as shi. Nuk mund ta kuptojmë pse jemi pa drita,” thonë banorët, të cilët janë të shqetësuar për mungesën e shërbimeve bazë.

Grykë Çaje: Banorët hapin vetë rrugët

Në Grykë Çaje, situata është po aq alarmante. Banorët, të cilët përballen me mungesë ndihme nga autoritetet, kanë dalë vetë me lopata për të hapur rrugën kryesore të fshatit. Ata theksojnë se në fshat ka të moshuar dhe të sëmurë, të cilët mund të kenë nevojë për kujdes urgjent, por rrugët e bllokuara pengojnë çdo lloj ndërhyrjeje.

Izolim total në Shishtavec, Topojan dhe Zapod

Në njësitë administrative Shishtavec, Topojan dhe Zapod, problemet janë edhe më serioze. Përveç izolimit nga bora dhe mungesës së energjisë elektrike, banorët përballen edhe me mungesën e valëve telefonike. Kjo situatë i ka lënë ata pa mundësi për të komunikuar me njëri-tjetrin apo për të kërkuar ndihmë në raste urgjente.

“Edhe në rast sëmundje apo fatkeqësie, nuk kemi si të njoftojmë njëri-tjetrin. Nuk ka as rrugë, as energji dhe as valë,” shprehen banorët, të cilët ndihen të braktisur nga autoritetet.

Thirrje për ndërhyrje urgjente

Banorët e fshatrave të izoluar kërkojnë zgjidhje të menjëhershme për këto problematika, duke theksuar se ankesat e tyre nuk janë marrë parasysh deri tani. Ndërkohë, situata sa vjen e përkeqësohet, duke vënë në rrezik jetën dhe mirëqenien e komuniteteve të prekura.

Autoritetet lokale dhe qendrore janë thirrur të marrin masa të menjëhershme për hapjen e rrugëve, rikthimin e energjisë elektrike dhe përmirësimin e shërbimeve bazë, për të shmangur pasojat e rënda që mund të shkaktojë kjo krizë në mes të dimrit.