Tensionet në Lindjen e Mesme kanë shkaktuar lëkundje të forta në tregjet globale të energjisë, pasi disa incidente detare pranë një prej korridoreve më strategjike për transportin e naftës kanë rritur menjëherë çmimet në bursat ndërkombëtare.
Të paktën tre anije janë sulmuar pranë Ngushtica e Hormuzit, një nga rrugët më të rëndësishme për transportin e energjisë në botë. Sipas Qendra e Operacioneve të Tregtisë Detare të Mbretërisë së Bashkuar, dy anije janë goditur drejtpërdrejt, ndërsa një predhë ka shpërthyer pranë një anijeje të tretë.
Ngushtica strategjike, përmes së cilës kalon rreth 20% e furnizimit global me naftë dhe gaz, është pothuajse e paralizuar. Më shumë se 150 cisterna raportohet se kanë mbetur të ankoruara në pritje. Ndërkohë, Irani ka paralajmëruar anijet tregtare të shmangin kalimin në këtë zonë, në një kohë kur tensionet me Shtetet e Bashkuara të Amerikës dhe Izraeli vijojnë të përshkallëzohen.
Reagimi në tregjet ndërkombëtare ishte i menjëhershëm. Në bursat aziatike, çmimi i naftës u rrit fillimisht me mbi 10%, ndërsa nafta Brent arriti në 78.72 dollarë për fuçi. Analistët paralajmërojnë se nëse tensionet vazhdojnë dhe trafiku detar mbetet i bllokuar, çmimi mund të kalojë pragun e 100 dollarëve për fuçi.
Ndërkohë, aleanca e vendeve prodhuese OPEC+ ka vendosur të rrisë prodhimin me 206 mijë fuçi në ditë, në përpjekje për të zbutur ndikimin në treg. Megjithatë, ekspertët e energjisë shprehen skeptikë për efektin real që kjo masë mund të ketë në një situatë kaq të tensionuar gjeopolitike.
Në të njëjtën kohë, kompania daneze e transportit detar Maersk ka njoftuar se disa nga anijet e saj do të devijohen nga rrugët kryesore detare në rajon për arsye sigurie, ndërsa situata mbetet e paqëndrueshme.
