Modelja shqiptare Misse Beqiri ishte vetëm 25 vjeçe kur vendosi kontakt për herë të parë me financierin amerikan Jeffrey Epstein, i dënuar më herët për pedofili dhe i përfshirë në një nga skandalet më të mëdha të dekadës së fundit.
Sipas dokumenteve të publikuara nga Departamenti i Drejtësisë i Shteteve të Bashkuara, emri i modeles shqiptare përmendet në 204 shkresa dhe komunikime që tashmë janë bërë publike. Edhe pse disa prej dokumenteve janë pjesërisht të redaktuara, në shumë raste emri i saj i plotë ka mbetur i dukshëm.
Nga komunikimet rezulton se kontakti i parë mes tyre është vendosur më 8 shtator 2011, kur Beqiri i ka dërguar një email Epsteinit duke u vetëprezantuar. Ajo shkruante se po e kontaktonte me sugjerimin e një personi të identifikuar si B. Tancredi dhe e informonte për udhëtimin e saj drejt New York.
“Përshëndetje Jeffrey, jam Misse, një shoqe e Tancredit. Ai më tha të të shkruaj në lidhje me qëndrimin tim në Nju Jork. Mikpritja juaj vlerësohet shumë! Do të mbërrij më datë 10 dhe do të largohem më datë 18. Tancredi më ka folur shumë për ju dhe për faktin sa shumë ju vlerëson, dhe mezi pres të takohemi.
Me respekt,
Missi.”
Këtij emaili i është përgjigjur asistentja personale e Epstein, Lesley Groff, e cila ka vijuar komunikimet duke i kërkuar fotografi dhe disa të dhëna për modelen shqiptare, e cila ishte rritur në Suedi dhe Angli.
Pas disa shkëmbimeve me email, në komunikim hyn edhe vetë Epstein, i cili në atë kohë kishte vetëm pak muaj që kishte përfunduar një dënim prej 18 muajsh për pedofili, nga të cilët kishte qëndruar rreth 13 muaj në burg.
“Përshëndetje Misse,
A mund të më dërgosh, të lutem, detajet e mbërritjes tënde në Nju Jork nesër? Kam rregulluar që gjatë qëndrimit tënd të akomodohesh në një nga apartamentet e mi për mysafirë. Adresa është 301 E 66th St. Do të jesh në apartamentin 4M. Portieri do të ketë një letër për ty me kodin e hyrjes së apartamentit; ne nuk përdorim çelësa, por tastierë me kod për të hyrë. A mund të më japësh edhe numrin tënd të telefonit?”
Sipas dokumenteve, pas këtyre komunikimeve modeles iu organizua udhëtimi drejt New York-ut për t’u takuar me Epstein më 16 shtator 2011. Logjistika e udhëtimit, përfshirë transportin nga aeroporti dhe akomodimin në një nga apartamentet e tij për mysafirë, u koordinua nga asistentja Groff.
Takimi mes tyre thuhet se është zhvilluar më 17 shtator 2011 në rezidencën e Epstein në Manhattan në orën 20:30.
Pas këtij takimi, komunikimet mes tyre kanë vijuar dhe nga mesazhet e publikuara vërehet një ton i afërt dhe personal. Në një moment Epstein i kërkon modeles t’i sugjerojë një shoqe në Milano për ta takuar, pasi ajo vetë ndodhej larg.
Sipas komunikimeve, modelja i ka thënë se kishte folur me një shoqe të saj, por ajo kishte hezituar pasi ishte në një lidhje.
Në email-et e mëvonshme përmenden gjithashtu plane për takime në Paris, Milano apo në Karaibe, si dhe mundësi për kontakte me persona të njohur të industrisë së modës në SHBA.
“Më 26 shtator 2011, në orën 16:19, Misse Begin shkroi:
Zemër, e humba telefonin… lol
Jam në Suedi, kam punë këtu këtë javë, më 10-ën po nisem për në Milano.
Si je? Po mendoja për ty dje…
Xxx”
Në një moment modelja i tregon se kishte nisur të dilte me një djalë, por se nuk ishte gati për një lidhje serioze.
“Më 26/09/2011, në orën 13:56, Jeffrey Epstein shkroi:
Jam në Paris, ku je?
Sapo mbërrita sot në shtëpi për Krishtlindje. Jam ende beqare, kam dalë me dikë, por nuk jam gati për asgjë serioze ende…
Besoj se udhëtimet po ma bëjnë pak rrëmujë jetën…
Ku je ti?”
“Më 23/12/2011, në orën 22:26, Jeffrey Epstein shkroi:
Ku je dhe si e ka emrin ai?”
Komunikimi i fundit që shfaqet në dokumentet e publikuara daton më 22 mars 2012, ndërsa nuk dihet nëse ekzistojnë edhe komunikime të tjera që nuk janë bërë ende publike.
Sot, Misse Beqiri është 39 vjeçe dhe nënë e dy fëmijëve. Ajo është bërë e njohur për publikun britanik edhe pas pjesëmarrjes në reality show-n The Real Housewives of Cheshire në vitin 2016.
Modelja është rritur në Suedi, ndërsa familja e saj ka origjinë nga Kosova. Në të kaluarën ajo ka qenë e martuar me portierin danez Anders Lindegaard, i cili ka luajtur për klubin anglez Manchester United.
