Tubimi i zhvilluar pasditen e sotme përpara godinës së Kryeministrisë dhe më pas në zonën e Kuvendit është shoqëruar me incidente dhe përplasje mes një pjese të protestuesve dhe forcave të rendit. Sipas autoriteteve, gjatë manifestimit janë regjistruar episode të dhunës që kanë sjellë pasoja për punonjësit e policisë dhe institucionet shtetërore.
Policia e Shtetit bëri të ditur se gjatë protestës disa individë kanë hedhur lëndë piroteknike, bomba molotov dhe sende të forta në drejtim të efektivëve, duke shkaktuar dëmtime fizike dhe djegie. Për shkak të plagëve të marra, 16 punonjës policie janë dërguar në spital për ndihmë mjekësore.
Sipas njoftimit zyrtar, strukturat e rendit kanë qenë të angazhuara gjatë gjithë zhvillimit të tubimit për të garantuar sigurinë publike dhe për të mundësuar ushtrimin e së drejtës kushtetuese për protestë paqësore. Autoritetet theksojnë se janë bërë vazhdimisht thirrje që pjesëmarrësit të shmangnin veprimet e dhunshme, por përplasjet kanë vijuar deri në përfundim të tubimit.
Policia ka nisur dokumentimin e të gjitha episodeve të dhunës me qëllim identifikimin dhe ndjekjen penale të personave përgjegjës. Në një deklaratë për mediat, drejtori i Përgjithshëm i Policisë së Shtetit, Ilir Proda, konfirmoi se deri tani janë shoqëruar 13 protestues në lidhje me ngjarjet.
Nga ana tjetër, kryetari i Partisë Demokratike, Sali Berisha, akuzoi policinë për sjellje të ashpër ndaj protestuesve, duke drejtuar kritika edhe ndaj zëvendësdrejtorit të Përgjithshëm të Policisë së Shtetit, Sokol Bizhga.
Autoritetet falënderuan qytetarët që u distancuan nga aktet e dhunës, si dhe përfaqësuesit e medias për pasqyrimin e zhvillimeve gjatë protestës.
