IDF konfirmon autenticitetin dhe nis hetim

Izraeli ka kërkuar ndjesë “ndaj çdo të krishteri” pasi një ushtar i tij në Liban është fotografuar duke goditur në fytyrë me çekan të rëndë një statujë të Jezusit.

Forcat e Mbrojtjes së Izraelit (IDF) konfirmuan se imazhi është autentik dhe njoftuan se do të hapin hetim, ndërsa kryeministri izraelit Benjamin Netanyahu e dënoi aktin.

Netanyahu deklaroi: “U trondita dhe u ndjeva i pikëlluar kur mësova se një ushtar i IDF-së ka dëmtuar një ikonë fetare katolike në jug të Libanit. E dënoj këtë veprim në termat më të fortë.”

Autoritetet ushtarake kanë nisur një hetim penal dhe, sipas tij, “do të ndërmerren masa disiplinore të ashpra ndaj autorit”.

Ministri i Jashtëm i Izraelit, Gideon Sa’ar, e cilësoi më herët ngjarjen si një “akt të turpshëm”, që është “plotësisht në kundërshtim me vlerat tona”.

“Ne kërkojmë ndjesë për këtë incident dhe ndaj çdo të krishteri që është ndjerë i fyer,” u shpreh Sa’ar.

Imazhi u publikua disa ditë pasi IDF hyri në një armëpushim me Hezbollahun, grupin shiit të mbështetur nga Irani.

Trupat izraelite kanë krijuar një zonë sigurie në jug të Libanit, pasi urdhëruan evakuimin e rreth 1.2 milionë civilëve, me përjashtim të disa fshatrave të krishtera.

Fotografia tregon se statuja e Krishtit, në përmasa reale, duket se është shkëputur pjesërisht nga kryqi, me pjesën e sipërme që varet pranë tokës. Një ushtar izraelit shihet duke mbajtur një çekan të madh, i cili duket se është ngulur në fytyrën e statujës.

Sipas raportimeve të mediave arabe, statuja ndodhej në fshatin e krishterë Debl, pranë kufirit me Izraelin.

IDF deklaroi se e konsideron incidentin “me shumë seriozitet” dhe se sjellja e ushtarit është “plotësisht në kundërshtim me standardet dhe vlerat e pritura nga trupat”.

Sipas ushtrisë, hetimi është në vijim dhe “do të merren masa të përshtatshme” ndaj personave të përfshirë, në përputhje me gjetjet e tij.