Tabloidi britanik “Daily Mail” ka publikuar imazhe nga salla e gjyqit ku shfaqet Ruben Saraiva, personi i dënuar me burgim të përjetshëm për vrasjen e biznesmenit Ardian Nikulaj në Shëngjin. Sipas raportimit të medias britanike, ai dyshohet se është paguar rreth 1 milion paund për të kryer atentatin.
Saraiva, i cili është rritur në Reading të Anglisë që në moshë të vogël, kishte hyrë në ambientet e hotelit luksoz të viktimës i maskuar si shpërndarës. Në momentin e sulmit, ai qëlloi gjashtë herë në drejtim të Nikulajt, duke i marrë jetën në vend.
Ngjarja, e ndodhur në prill të vitit 2023, dyshohet të jetë organizuar nga një grup i strukturuar me bazë në Mbretërinë e Bashkuar. Sipas prokurorisë, Saraiva kishte mbërritur në Shqipëri rreth dy muaj para atentatit dhe ishte pjesë kyçe e një ekipi që kishte për detyrë vëzhgimin dhe ekzekutimin e planit.
Gjatë gjykimit në Lezhë, nën masa të forta sigurie, gjyqtari Lirim Bulica e shpalli fajtor për vrasje me paramendim në bashkëpunim dhe armëmbajtje pa leje, duke e dënuar me burgim të përjetshëm. Në momentin e shpalljes së vendimit, ai reagoi me qetësi, duke tundur kokën nga kafazi i xhamtë ku mbahej.
Hetimet kanë nxjerrë në pah se vrasja lidhet me një konflikt të gjatë mes dy familjeve shqiptare, që dyshohet të ketë rrënjë në një histori gjakmarrjeje disa dekadëshe. Prokurorët pretendojnë se organizatorët kanë zgjedhur shtetas të huaj për të shmangur dyshimet, pasi viktima ishte në gatishmëri ndaj rreziqeve të mundshme nga persona vendas.
Sipas dosjes hetimore, anëtarë të tjerë të grupit kishin qëndruar në hotel si turistë, duke krijuar lidhje me familjen e Nikulajt dhe duke monitoruar lëvizjet e tij përpara se të jepej sinjali për ekzekutim.
Pas krimit, autori u largua me motor dhe kaloi kufirin drejt Greqisë, për t’u arrestuar më pas në Marok me dokumente të falsifikuara. Ai u ekstradua në Shqipëri për t’u përballur me drejtësinë.
Ndërkohë, disa shtetas britanikë të dyshuar si pjesë e grupit vijojnë betejën ligjore në Mbretërinë e Bashkuar kundër ekstradimit, duke mohuar çdo përfshirje në ngjarje.
Familja e viktimës e ka cilësuar vendimin ndaj Saraivës si një hap drejt drejtësisë, por ka theksuar se dhimbja mbetet e madhe, veçanërisht për fëmijët e Nikulajt që janë rritur pa praninë e të atit.
