Gahler: Struktura të tilla nuk duhet të bëhen pjesë e Bashkimit Evropian, korrupsioni rrezikon integrimin e Shqipërisë

Në një diskutim në Komisionin për Punët e Jashtme në Parlamenti Europian, eurodeputeti gjerman Michael Gahler u ndal te zhvillimet e fundit politike në Shqipëri, duke theksuar se përparimi drejt Bashkimit Europian duhet të vlerësohet mbi bazën e rezultateve konkrete dhe jo vetëm mbi deklaratat politike.

Gahler tha se vizita e fundit e delegacionit në Shqipëri ofroi një panoramë të qartë mbi realitetin në terren. Sipas tij, pavarësisht atmosferës pozitive gjatë takimeve zyrtare, vlerësimi i situatës duhet të bazohet te zbatimi real i reformave dhe jo te retorika politike.

Ai theksoi se informacionet dhe shqetësimet e paraqitura nga organizatat e shoqërisë civile gjatë takimeve ishin veçanërisht domethënëse. Sipas eurodeputetit, këto sinjale tregojnë për ekzistencën e strukturave të rrënjosura korruptive dhe të lidhura me krimin e organizuar, të cilat, sipas tij, arrijnë deri në nivelet më të larta të pushtetit.

Gjatë fjalës së tij, Gahler përmendi edhe rastin e zëvendëskryeministres Belinda Balluku, duke e konsideruar atë një shembull që, sipas tij, ngre pikëpyetje mbi mënyrën se si trajtohen çështjet e ndjeshme politike në vend.

Ai vuri në dukje se, edhe pse Gjykata Kushtetuese e Shqipërisë ishte shprehur se SPAK kishte të drejtë të vepronte, mazhoranca në Parlament refuzoi heqjen e imunitetit. Sipas Gahler, ky vendim tregon qartë qasjen e shumicës kur përballet me akuza dhe hetime të ndjeshme.

Në përfundim, eurodeputeti theksoi se Bashkimi Europian duhet të mbajë një qëndrim të qartë dhe të vendosur në raport me Shqipërinë. Ai nënvizoi se parimi i shtetit të së drejtës duhet të zbatohet pa përjashtim për të gjithë dhe se strukturat problematike duhet të çmontohen përpara çdo hapi drejt anëtarësimit në BE.

Fjala e plotë:

Edhe unë pata kënaqësinë të marr pjesë në këtë vizitë javën e kaluar. Falënderoj kolegun Shieder, si edhe raportuesin e EPP-së, dhe jam pothuajse plotësisht dakord me gjithçka që u tha. Mendoj se vizita në Shqipëri ofroi një pasqyrë të qartë dhe të vlefshme mbi situatën në terren.

Kryeministri, gjatë darkës ku na ftoi, ishte në formë shumë të mirë dhe takimi ishte mjaft i këndshëm. Megjithatë, kjo nuk duhet të na shpërqendrojë nga vlerësimi objektiv i realitetit, veçanërisht në lidhje me kapitujt e negociatave që janë hapur apo mbyllur. Siç u theksua me të drejtë, “prova e pudingut është në të ngrënë”, pra, ajo që ka rëndësi është zbatimi konkret në praktikë dhe rezultatet reale në terren.

Përshtypja ime, e cila shkon përtej takimeve që zhvilluam si me përfaqësuesit e mazhorancës, ashtu edhe me ata të opozitës është se informacionet dhe shqetësimet e ngritura nga organizatat e shoqërisë civile ishin veçanërisht domethënëse. Ato nxorën në pah ekzistencën e strukturave të rrënjosura që nuk mund të bëhen pjesë e Bashkimit Evropian duke vazhduar të funksionojnë si më parë. Ekzistojnë struktura korruptive dhe aktivitete të krimit të organizuar që, sipas të dhënave të paraqitura, shtrihen deri në nivelet më të larta të pushtetit.

Mendoj se rasti Balluku është një ilustrim i qartë në këtë drejtim. Pavarësisht se Gjykata Kushtetuese u shpreh se SPAK kishte të drejtë të vepronte, mazhoranca refuzoi të heqë imunitetin. Kjo, në vlerësimin tim, tregon qartë qëndrimin e saj kur bëhet fjalë për përballjen me pretendime serioze dhe hetime në këtë fushë.

Kjo situatë duhet të ndikojë edhe në qëndrimin tonë. Duhet të insistojmë që parimi i shtetit të së drejtës të zbatohet pa përjashtim për të gjithë dhe që strukturat problematike të çmontohen përpara çdo anëtarësimi. Struktura të tilla nuk duhet të bëhen pjesë e Bashkimit Evropian.