Mijëra abonentë të operatorit celular One Albania janë përballur mbrëmjen e djeshme me probleme serioze në shërbimin e telefonisë dhe internetit.
Sipas raportimeve të shumta të qytetarëve, për më shumë se një orë telefonatat dhe lidhja me internetin kanë qenë jashtë funksioni, duke krijuar vështirësi të konsiderueshme për përdoruesit që mbështeten në këtë operator për komunikim dhe akses online.
Shumë abonentë kanë reaguar në rrjetet sociale dhe në kanale të ndryshme komunikimi, duke denoncuar ndërprerjen e shërbimit për të cilin paguajnë çdo muaj. Ata kanë kërkuar sqarime nga kompania për problemin teknik që ka shkaktuar këtë situatë.
Deri në këto momente, nuk dihet ende shkaku i saktë i ndërprerjes së shërbimeve. Nga ana tjetër, One Albania nuk ka dhënë ende një reagim publik apo njoftim zyrtar për të shpjeguar arsyet e problemit dhe kohën e rikthimit të plotë të shërbimit.
Ndërprerje të tilla nuk janë një fenomen i ri për abonentët e këtij operatori. Edhe më parë janë raportuar raste të ngjashme ku shërbimet e telefonisë dhe internetit kanë pësuar probleme për periudha të caktuara.
Në vitet e fundit, kompania është përballur gjithashtu me incidente teknike dhe sulme kibernetike që kanë ndikuar në funksionimin e sistemeve të saj, duke shkaktuar shqetësim tek përdoruesit.
