EKSKLUZIVE / Publik.al

Bashkia Kukës i jep 15 milionë lekë OJF-së së Lavdrim Shehut kunatit të  shokut  Albert Halili

Një transfertë financiare nga buxheti publik i Bashkisë Kukës ngre dyshime serioze për konflikt interesi dhe favorizim familjar. Dokumentet zyrtare tregojnë se një grant me vlerë 15 milionë lekë (të vjetra) i është dhënë organizatës jofitimprurëse “Qendra për Progres Rinor” OJF, ndërsa në krye të saj rezulton Lavdrim Shehu, kunati i kryetarit të Bashkisë Kukës, Albert Halili.

Sipas të dhënave të publikuara në platformën zyrtare Open Spending Albania, subjekti “Qendra për Progres Rinor” OJF rezulton përfitues i një transaksioni nga thesari me vlerë 480,000 lekë Pagesa është regjistruar në degën e thesarit Kukës, duke konfirmuar se fondi vjen nga institucionet publike të qarkut.

Lidhja familjare me kryebashkiakun

Dokumentet e regjistrit të pronarëve përfitues tregojnë se:
• Subjekti: “Qendra për Progres Rinor” OJF
• NIPT: L67604271N
• Pronari përfitues / themelues: Lavdrim Shehu
• Shtetësia: shqiptare
• Statusi: themelues dhe kontrollues i organizatës

Burime lokale në Kukës konfirmojnë se Lavdrim Shehu është kunati i kryetarit të Bashkisë Kukës, Albert Halili. Kjo lidhje familjare e bën transferimin e fondit publik një rast potencial të konfliktit të interesit, pasi fondet e bashkisë mund të kenë përfunduar tek një subjekt i kontrolluar nga një familjar i drejtpërdrejtë i kryetarit të institucionit.

Në rastet kur institucionet publike shpërndajnë grante apo financime për organizata jofitimprurëse, ligji kërkon:
• transparencë të plotë mbi procedurën e përzgjedhjes
• shmangie të konfliktit të interesit
• deklarim të lidhjeve familjare me vendimmarrësit publikë

Në këtë rast, lidhja familjare mes drejtuesit të OJF-së dhe kryebashkiakut ngre pikëpyetje serioze mbi mënyrën se si është dhënë financimi.

Pse është problematik rasti

Ekspertët e qeverisjes vendore theksojnë se nëse një bashki financon një subjekt të lidhur me familjarë të drejtuesit të saj, mund të kemi:
• favorizim të drejtpërdrejtë në shpërndarjen e fondeve publike
• shkelje të ligjit për konfliktin e interesit
• keqpërdorim të buxhetit lokal

Rasti bëhet edhe më i ndjeshëm duke pasur parasysh se Kukësi është një nga qarqet më të varfra të vendit, ndërsa fondet publike duhet të përdoren për projekte me ndikim real për komunitetin.

Nevojiten sqarime

Deri tani nuk ka një reagim publik nga Bashkia Kukës për:
• procedurën e përzgjedhjes së OJF-së
• arsyen pse u financua pikërisht ky subjekt
• nëse kryebashkiaku Halili është vetëpërjashtuar nga vendimmarrja

Nëse konfirmohet se fondi është dhënë nga institucioni që drejton Albert Halili për organizatën e kunatit të tij, rasti mund të përbëjë një çështje që meriton verifikim nga ILDKPKI dhe strukturat e hetimit financiar.

Publik.al do të vijojë të publikojë dokumente dhe të dhëna të tjera mbi këtë rast duke i referuar me një kallëzim në SPAK.