Protesta kundër projektit TID është rikthyer sot në qytetin e Durrësit, ku dhjetëra banorë, banesat e të cilëve preken nga ky projekt, janë mbledhur para godinës së Bashkisë për të kërkuar sqarime dhe transparencë.
Sipas tyre, projekti prek 74 familje, të cilat rrezikojnë të humbasin banesat.
Fillimisht, protestuesit kanë ndjekur kryetarin e Këshillit të Qarkut Durrës, Alfred Mullaraj, ndërsa më pas kanë rrethuar edhe kreun e Inspektoratit të Mbrojtjes së Territorit (IMT) të Bashkisë Durrës, duke i kërkuar llogari për vendimet dhe dokumentacionin që lidhet me projektin. Në një moment tensioni, banorët kanë marrë në dorë dosjen që ai mbante me vete, duke pretenduar se kërkojnë të shohin dokumentet që prekin pronat e tyre.
Situata u tensionua kur protestuesit bllokuan rrugën në shenjë kundërshtimi, duke deklaruar se po u cenohen të drejtat dhe pronat nga një projekt që, sipas tyre, është vendosur pa konsultim real me komunitetin.
Në vendngjarje ndërhynë forcat e Policia e Shtetit për të shpërndarë turmën dhe për të rikthyer qarkullimin normal të mjeteve. Pas ndërhyrjes, tre protestues u shoqëruan në komisariat, ndërsa një pjesë e banorëve tentuan të pengonin largimin e tyre me furgonin e policisë.
Protestuesit tentuan gjithashtu të futeshin në ambientet e Bashkia Durrës, por nuk u lejuan. Në shenjë revolte, ata hodhën vezë dhe sende drejt godinës.
Gjatë protestës pati edhe fyerje dhe thirrje të ashpra ndaj përfaqësuesve vendorë, përfshirë kryebashkiaken Emiriana Sako, ndërsa banorët kërkuan pezullimin e menjëhershëm të projektit dhe hapjen e një procesi transparent konsultimi.
Deri në këto momente, nga Bashkia Durrës nuk ka një reagim zyrtar të detajuar mbi kërkesat e banorëve apo mbi incidentet e ndodhura gjatë protestës.
