Një ngjarje e rëndë është regjistruar në Itali, ku një 29-vjeçar shqiptar ka humbur jetën pas një sulmi me armë zjarri në qytetin e Arezzo-s.
Viktima është identifikuar si Gjergj Përgegaj. Sipas raportimeve të mediave italiane, ai është qëlluar nga një bashkëkombas 35-vjeçar, i cili dyshohet se ka vepruar për motive xhelozie.
Ngjarja ka ndodhur mbrëmjen e djeshme, menjëherë pasi i riu kishte përfunduar turnin e punës si kamerier. Sipas burimeve, autori e ka gjetur viktimën duke biseduar me ish-të dashurën e tij, një shtetase me origjinë rumune, çka ka çuar në përshkallëzim të menjëhershëm të situatës.
Në gjendje të rënduar emocionale, 35-vjeçari ka nxjerrë armën dhe ka qëlluar disa herë në drejtim të Përgegajt. Një prej plumbave e ka goditur në fyt, duke i shkaktuar vdekjen në vend.
Shërbimet e emergjencës kanë mbërritur menjëherë në vendngjarje, por nuk kanë mundur të bëjnë asgjë për ta shpëtuar 29-vjeçarin.
Pas krimit, autori është larguar nga vendi i ngjarjes, por është arrestuar disa orë më vonë nga policia italiane, pa bërë rezistencë.
Trupi i viktimës është transportuar në morgun e spitalit “San Donato”, ndërsa autoritetet vijojnë hetimet për të sqaruar plotësisht rrethanat e kësaj vrasjeje.
