Publik.al | 30 Mars 2026
Një panoramë e rëndë e menaxhimit të parave publike del nga raporti i fundit i Komisioni i Prokurimit Publik për vitin 2025, ku disa nga institucionet kryesore shtetërore rezultojnë të përfshira në procedura tenderuese problematike me vlera që arrijnë qindra milionë euro.
Në epiqendër të kësaj tabloje qëndron Agjencia Kombëtare për Shoqërinë e Informacionit, e cila jo vetëm rezulton me numrin më të lartë të ankesave, por është gjithashtu nën hetim nga SPAK. Dy ish-drejtuese të këtij institucioni dyshohen si pjesë e një skeme të strukturuar për përvetësimin e tenderëve.
Hetimet morën shtysë pas rrëmbimit në gusht 2025 të biznesmenit Gerond Meçe, për të cilin dyshohet se u shantazhua për të tërhequr ankesat ndaj procedurave të AKSHI pranë KPP.
AKSHI: Gjysma e tenderëve nën kontestim
Të dhënat janë të qarta: nga 94 tenderë të zhvilluar nga AKSHI gjatë vitit 2025, plot 43 janë ankimuar. Në 62.7% të rasteve, KPP ka pranuar plotësisht ose pjesërisht ankesat, duke konstatuar shkelje. Vlera e këtyre procedurave arrin në 10.7 miliardë lekë (rreth 111 milionë euro).
Kjo nuk përbën një rast të izoluar, por një model të përsëritur të procedurave të kontestuara, ku dyshimet kryesore lidhen me kriteret e tenderëve – shpesh të konsideruara si të “qepura” për përjashtimin e konkurrencës.
Posta dhe QSUT: Shifra që konfirmojnë dështimin
Në të njëjtën listë problematike renditet edhe Posta Shqiptare, ku 47.7% e tenderëve janë ankimuar dhe institucioni ka humbur në 62% të rasteve në KPP.
Ndërkohë, Qendra Spitalore Universitare Nënë Tereza paraqet një tjetër fenomen shqetësues: edhe pse vetëm 8.5% e procedurave janë ankimuar, kur kjo ndodh, bizneset fitojnë pothuajse gjithmonë. Nga 25 ankesa, 19 janë fituar nga operatorët ekonomikë – një normë humbjeje prej 76% për institucionin.
Bashkitë dhe institucionet publike: shkelje të përhapura
Në nivel vendor, Bashkia Durrës dhe Bashkia Kamëz shfaqen si ndër më problematiket, me përkatësisht 61.9% dhe 58.3% të ankesave të pranuara. Në listën e institucioneve me problematika përfshihen gjithashtu:
- Bashkia Tiranë
- Spitali Rajonal Durrës
- Ujësjellës Kanalizime Tiranë
- Albpetrol
- Operatori i Blerjeve të Përqendruara (OBP)
OBP rezulton institucioni me volumin më të madh financiar dhe numrin më të lartë të ankesave (149), ku në 45% të rasteve është konstatuar shkelje.
Ku qëndron problemi real
Raporti evidenton qartë se problemi kryesor nuk është vetëm tek kriteret fillestare, por tek faza vendimtare: vlerësimi i ofertave.
- 62.5% e ankesave lidhen me përzgjedhjen e fituesit
- 37% lidhen me kriteret e tenderit
Ky raport tregon një devijim sistematik në mënyrën se si institucionet vendosin fituesit, duke ngritur dyshime serioze për manipulim të procesit.
343 milionë euro tenderë me shkelje
Në total, rreth 52% e ankesave janë gjetur të bazuara, duke përfshirë procedura me vlerë mbi 33 miliardë lekë (343 milionë euro).
Ndërkohë, vetëm gjatë vitit 2025:
- 1197 ankesa janë depozituar në KPP
- 101.3 miliardë lekë janë bllokuar përkohësisht
- 76 miliardë lekë janë procedura që kanë përfunduar në shqyrtim
“Lufta” për buxhetin
Të dhënat tregojnë një realitet të qartë: gara për tenderët publikë është kthyer në një betejë për kontrollin e fondeve shtetërore.
- 483 ankesa për mallra (19.9 miliardë lekë)
- 95 ankesa për punë publike (56.3 miliardë lekë)
- pjesa tjetër për shërbime (25.1 miliardë lekë)
Ndër 361 kompani që kanë ankimuar, 350 janë biznese të mëdha – një tregues se përplasja kryesore zhvillohet mes aktorëve të fuqishëm ekonomikë.
