Qarkullimi i automjeteve në aksin kombëtar Librazhd–Prrenjas është rikthyer në normalitet prej mesditës së djeshme, por situata në segmentin e dëmtuar në zonën e “Arrave të Gurrës”, në Dragostunjë, vijon të mbetet delikate. Ky segment është pjesë e projektit të zgjerimit të Korridori VIII, një nga veprat më të rëndësishme infrastrukturore në vend.

Punimet në zonën e prekur janë pezulluar për disa muaj, pas një incidenti të rëndë gjeologjik që shkaktoi rrëshqitje masive dhe zhvendosje të një sipërfaqeje rreth 1500 metra katrorë. Si pasojë e lëvizjes së dheut, u dëmtua një pjesë e rrugës kombëtare ekzistuese, segmenti në ndërtim i Korridorit VIII, traseja e hekurudhës Librazhd–Xhyrë, si edhe një pjesë e rrjetit të Tensionit të Lartë.

Për të shmangur çdo rrezik për drejtuesit e mjeteve, Autoriteti Rrugor Shqiptar ka urdhëruar ndërprerjen e plotë të punimeve në zonën problematike deri në përfundimin e një rruge alternative që do të garantojë devijimin e sigurt të trafikut.

Sipas planit të publikuar, nga kjo mesjavë nis ndërtimi i një rruge provizore me gjatësi 1.3 kilometra. Ajo do të ndërtohet paralelisht me trasenë hekurudhore dhe përgjatë lumit Shkumbin, duke krijuar një korridor të përkohshëm lëvizjeje për automjetet. Kjo zgjidhje synon të stabilizojë situatën dhe të hapë rrugën për rifillimin e ndërhyrjeve në segmentin e dëmtuar.

Drejtori i ARRSH-së, Ami Kozeli, ka bërë të ditur se ndërtimi i kësaj rruge alternative do të zgjasë minimalisht 60 ditë nga momenti i nisjes së punimeve. Vetëm pasi ajo të përfundojë dhe të hapet për qarkullim, do të rinisin ndërhyrjet në zonën e prekur nga rrëshqitjet masive.

Zona e Arrave të Gurrës tashmë konsiderohet pikë kritike për shkak të kushteve të ndërlikuara gjeologjike dhe ndikimit të punimeve në terren. Institucionet përgjegjëse po mbajnë nën monitorim të vazhdueshëm situatën, me prioritet maksimal garantimin e sigurisë së qytetarëve dhe vijimin e projektit pa rreziqe të tjera.

Megjithëse rikthimi i qarkullimit në aksin Librazhd–Prrenjas ka lehtësuar ndjeshëm lëvizjen drejt juglindjes së vendit, sfida e stabilizimit përfundimtar të segmentit në zgjerim mbetet ende një çështje që kërkon zgjidhje teknike afatgjata në muajt në vijim.