VLORË – Vlora është zhytur sërish në kaosin e mungesës së ujit të pijshëm, duke rikthyer një problem që është kthyer tashmë në simbol të dështimit total të menaxhimit të ujësjellësit dhe institucioneve vendore.
Defekti i radhës apo paaftësi kronike?
Ujësjellës Kanalizime Rajoni Vlorë njoftoi se shkak është bërë një avari e rëndë në tubacionin 500 pranë zonës së “Kalasë”. Ky defekt ka sjellë stakimin e menjëhershëm të të gjitha stacioneve, duke lënë pothuajse të gjithë qytetin pa asnjë pikë uji.
Përgjigjja zyrtare mbetet e njëjta: “Grupet teknike janë në terren dhe po punojnë gjatë natës”. Për vlonjatët, kjo fjali tashmë tingëllon si një tallje e përsëritur.
“Sa herë plasin tubot, sa herë qyteti mbetet pa ujë, përgjigjja është e njëjtë, ndërsa zgjidhja mungon prej vitesh.”
Kronika e një dështimi të paralajmëruar
Ky kolaps nuk është një rast i izoluar. Kujtojmë se:
Dhjetor 2025: Qyteti mbeti për ditë të tëra pa ujë, duke paralizuar mijëra familje dhe biznese.
Premtimet: Pati deklarata për investime dhe modernizim që rezultuan “fushata” pa efekt.
Sot: Historia përsëritet identike, duke treguar se asgjë nuk ka ndryshuar në mirëmbajtjen e rrjetit.
Akuzat ndaj Drejtorit Klevis Kaso
Në qendër të kritikave është drejtori i ujësjellësit, Klevis Kaso. Ndërsa qyteti vuan, drejtoria mjaftohet me njoftime rutinë në rrjetet sociale, sikur paralizimi i një qyteti të tërë të ishte një procedurë normale administrative.
Pyetjet që kërkojnë përgjigje:
1 Ku kanë shkuar fondet e akorduara për modernizimin e rrjetit?
2 Si mundet që një qytet turistik, “krenaria e jugut”, të mbetet peng i një tubacioni që çahet sapo sistemi vihet në provë?
3 Kush mban përgjegjësi për dëmet ekonomike ndaj bizneseve të Vlorës?
Në Vlorë nuk mungon vetëm uji; mungon përgjegjësia. Derisa ky dështim i përsëritur të mos ketë një emër dhe një pasojë për drejtuesit, qytetarët do të vazhdojnë të paguajnë faturat për një shërbim që nuk e marrin.
