Korporata Shqiptare e Investimeve ka shtyrë sërish afatin për procedurën konkurruese të projektit “Lift Tower”, që parashikon zhvillimin me partneritet publik-privat të kompleksit me tre kulla pranë Kadastrës së Tiranës. Sipas Njoftimit nr. 47/8, datë 23 shkurt 2026, publikuar në Fletoren Zyrtare më 25 shkurt, procedura e planifikuar për 30 janar 2026 do të zhvillohet më 19 mars 2026.
Bëhet fjalë për shtyrjen e gjashtë të njëpasnjëshme të projektit. Afatet janë lëvizur nga nëntori 2024 në janar 2025, maj 2025, shtator 2025, 30 janar 2026 dhe tashmë në 19 mars 2026. Zyrtarisht, procedurat e mëparshme janë anuluar me argumentin e ofertave të paleverdishme, por vonesat e përsëritura kanë shtuar dyshimet për negociata të zgjatura mbi kushtet e marrëveshjes.
Projekti, i paraqitur si “Rijetëzim i godinës së Kadastrës”, parashikon ndërtimin e tre kullave 40 kate mbi tokë dhe 7 kate nëntokë, me funksione të përziera: banim, zyra, ambiente tregtare, hotel, rezidencë studentore dhe parkime. Modeli i ndarjes së sipërfaqeve ka qenë një nga pikat më të debatuara.
Sipas skemës së publikuar, 100% e sipërfaqeve të banimit dhe 60% e sipërfaqeve tregtare, të zyrave dhe parkimeve nëntokësore do t’i kalojnë partnerit privat. Shteti, si pronar i truallit, do të përfitojë 40% të sipërfaqeve tregtare, zyrave dhe parkimeve, përfshirë edhe ambientet e reja për Kadastrën e Përgjithshme.
Në tre shpalljet e para kanë shprehur interes kompanitë “Edil Al-It”, “DK Construction ONE Corp” dhe “Alko Impex”, por procedurat janë anuluar. Ndërkohë, për projektimin janë përzgjedhur gjashtë studio ndërkombëtare: Baukuh Studio Associato, Muoto & Sam Chermayeff Office, Yellow Office, Bollinger Grohmann, Atmoslab Simoj Boudvin dhe Arkimade.
Zgjatja e vazhdueshme e afateve dhe anulimet e njëpasnjëshme e vendosin projektin “Lift Tower” në qendër të debatit për transparencën dhe kushtet reale të partneritetit publik-privat, ndërsa finalizimi i tij mbetet ende i paqartë.
