Pas operacionit në zemër,plaga e tij kirurgjikale është përkeqësuar, duke u infektuar dhe qelbëzuar
Në Institucionin e Ekzekutimit të Vendimeve Penale (IEVP) 313 ndodhet një i ri 24-vjeçar me inicialet F.Galpi, i dënuar nga SPAK, i cili po vuan një dënim të dhënë nga drejtësia. Megjithatë, përtej masës penale, ai po përballet me një sfidë shumë më të rëndë: gjendjen e tij kritike shëndetësore, e cila është lënë në harresë nga autoritetet përgjegjëse.
I riu ka kryer një operacion të rëndë në zemër dhe aktualisht vuan nga pasoja serioze të kësaj ndërhyrjeje. Sipas informacioneve tona, plaga e tij kirurgjikale është përkeqësuar, duke u infektuar dhe qelbëzuar. Pavarësisht kësaj situate alarmante, askush nuk ka ndërmarrë asnjë veprim për ta transportuar në spital dhe për t’i ofruar ndihmën e nevojshme mjekësore. Ai vetë e ka kërkuar me ngulm trajtimin mjekësor, por kërkesat e tij kanë rënë në vesh të shurdhër. Denoncimin e bëri edhe avokati i tij Arjan Curri në “Top Stary” .
Institucionet kompetente, që duhet të garantojnë trajtimin dhe kujdesin shëndetësor për çdo të burgosur, e kanë injoruar plotësisht gjendjen e tij të rënduar. Për ta, e vetmja gjë që duket se ka rëndësi është që ai të vuajë dënimin e tij, pa marrë parasysh që shëndeti i tij po përkeqësohet dita-ditës. Një trajtim i tillë çnjerëzor dhe shpërfillja e plotë e të drejtave themelore të njeriut përbëjnë një skandal që kërkon reagim urgjent nga autoritetet përkatëse dhe nga shoqëria civile.
A do të lejojë shteti që një i ri të përballet me pasoja të rënda apo edhe fatale, vetëm sepse ndodhet pas hekurave? Apo do të ndërmarrë veprimet e duhura për të garantuar të drejtën e tij bazë për trajtim mjekësor? Kjo pyetje kërkon përgjigje dhe veprim të menjëhershëm.
