Në këtë vend, ku tallavaja nuk është thjesht muzikë, por një mënyrë jetese e subvencionuar nga taksat e popullit, kemi një tjetër perlë të skenës shqiptare: Monika Lubonja, e shpallur “artiste” nga mediat që rrinë në prehrin e Erion Veliajt. Kur u kap “shefi” me dosjet e SPAK-ut në dorë, Monika u hodh në skenë me një reagim të zjarrtë në mbrojtje të tij, sikur të ishte betuar për besnikëri artistike ndaj kunjave të bashkisë.
Por prisni, mos mendoni se ky është vetëm një akt heroik spontan. Jo, jo! Në fakt, zonja Lubonja ka qenë e punësuar prej vitesh në Bashkinë e Tiranës, duke marrë një pagë modeste prej 1,140 eurosh në muaj si këshilltare e Veliajt. Çfarë ka këshilluar Monika për kreun e bashkisë? Të hedhë një valle popullore sa herë SPAK-i troket në derë? Apo ndoshta ka dhënë këshilla artistike për mënyrën më elegante të shpërndarjes së fondeve publike?
“Big Brother” dhe konsulencat për veliajn
Ajo që e bën këtë histori edhe më gazmore është fakti se Monika Lubonja ka qëndruar për muaj të tërë në Big Brother, duke marrë rrogën si këshilltare. Imagjinoni skenën: Erion Veliaj në zyrë, i përhumbur në hallet e veta, dhe nëpërmjet valëve të televizorit merr “këshilla” nga Monika, e cila ndoshta mes një debati për nominime, flet edhe për estetikën e rrugëve të Tiranës. Një këshilltare kaq efikase, sa mund ta bëjë punën edhe nga reality show-t, meriton të paktën një ‘çelës’ nga Veliaj!
Po nuk mjaftonte kaq. Nga këshilltare e padukshme, u katapultua drejtoreshë e një institucioni fantazmë, Qendra e Restaurimit dhe Realizimit të Veprave të Artit Tirana. Emri i gjatë është sa për të mbuluar faktin se kjo është një drejtori e krijuar për të paguar personazhe publike që më pas t’i kthehen Veliajt si mburoja PR-i kur gjërat shkojnë keq. Pra, qytetarët e Tiranës paguajnë që Veliaj të ketë një ushtri personazhesh gati për t’i dalë në mbrojtje!
Tallavaxhinjtë e buxhetit të bashkisë
Po Monika nuk është e vetme. Lista e artistëve të Veliajt është një playlist e vërtetë tallavaje:
• Ermal Mamaqi – 80,000 euro
• Noizy – 300,000 euro
• Klea Huta – 35,000 euro
• Ilir Shaqiri – 30,000 euro
• Anxhela Peristeri – 36,000 euro
Nëse mendonit se këta njerëz jetojnë nga arti i tyre, mendohuni prapë! Të gjithë këndojnë, kërcejnë dhe bëjnë humor, por refreni është gjithmonë i njëjtë: “Pagoi bashkia, vazhdon loja!”.
Pra, ndërkohë që qytetarët paguajnë taksa për ujë që nuk pihet, rrugë që hapen e mbyllen çdo muaj dhe pemë plastike, Veliaj shpenzon miliona për të krijuar një trupë artistike propagande. Me këto para mund të ishin ndërtuar shkolla, spitale apo të ishte përmirësuar transporti publik. Por pse të harxhohen për qytetarët kur mund të blihen “yjet” e Instagramit që të bëjnë propagandë falas për kryebashkiakun?
Në fund të ditës, ky është një reality show i vërtetë, ku Veliaj është producenti, Monika është aktorja, dhe qytetarët janë spektatorët e mashtruar që paguajnë biletën pa dëshirë.
E kështu vazhdon tallavaja e politikës, ku të gjithë kërcejnë sipas ritmit të fondeve publike. Muzika vazhdon, por SPAK ka ndryshuar melodinë – dhe shpejt, disa nga këto “artistë” mund të performojnë në skena shumë më të vogla… me drita shumë më të errëta!
